SIGLO XX

XX. mendearen ondarea
KLASIKOAK S.A. 1991ko irailean eratu zen BBV Fundazioa (gaur egun FBBVA), Euskal Erkidegoko Aurrezki Kutxen (BBK,Kutxa, eta Vital) eta Euskal Herriko eta Deustuko Unibertsitateen ekimen partekatuaren ondorio gisa. Ideien historia unibertsalean garrantzia izan duten lanak euskaraz jartzea izan zen hasieratik elkartearen helburu nagusia. Pentsamendu unibertsalean erpina jo duten obra klasikoak euskaraz paratzea,alegia.
Orain, urteak pasatu ondoren, ez da dudarik garai hartako proiektu hura ongi bete dela, katalogo honetan ikus daitekeen bezala. Ehun lanetik gora ditu euskal irakurleak: bilduma honetan ageri dira pentsalari klasikoak, aspaldikoak, eta ez hain aspaldikoak. Betiere, eragin nabaria izan duten pentsalariak. Holako bilduma batean arrakasta izateko hainbeste urrats egin behar dira: autoreak eta lanak aukeratu lehenik; jatorrizko hizkuntzatik testua euskaratzeko gai diren itzultzaileak aurkitu (50 itzultzaile baino gehiagok hartu du parte); lehenbiziko itzulpenaren testua berrikusiko duten espezialistak aurkitu, eta lanaren sarrerak egin ditzaketen aditu aproposak bereizi. Talde lan handia da hau, eta talde horretan parte hartu izan duten guztien ahaleginari zor zaio holako lan oparoa. Beraz, hemen daude bilduak, modu sistematiko batean, gure zibilizazioaren nondik norakoak markatu dituzten pentsalari nagusiak. Lan hauek hainbeste arlotakoak dira: filosofia, soziologia, psikologia, biologia, zuzenbidea, antropologia, historia, ekonomia, hizkuntzalaritza, erlijioa, eta abar.
Eta zortzi hizkuntza izan dira denetara liburuen iturri: alemana, daniera, gaztelania, frantsesa, greziera, ingelesa, italiera eta latina.
Irakurlea konturatuko denez, azkeneko tituluak XX. mendeari dagozkio. Elkartearen asmoa baita, behin historiako lan garrantzizkoenak euskaraz jarri ondoren, XX. mendeko lanak aztertu eta mende horretako emaitzak ere denen esku jartzea, bigarren fase batean. Liburu horiek dira hurrengo urteetan argitara emango direnak.